अर्जेन्टिनाका चर्चित फुटबलर लियोनल मेसी फेरि भारत आउने भएका छन् । उनी १३ वर्षपछि पुन भारत आउन लागेका हुन् । केरला राज्यका खेलकुद मन्त्री वी अब्दुर हिमानले मेसी सहित अर्जेन्टिनाको फुटबल टोली अर्को वर्ष अन्तर्राष्ट्रिय खेलका लागि आउने जानकारी दिएका छन् ।
उनले भने, ‘विश्वको नम्बर एक फुटबल टोली अर्जेन्टिना र कप्तान लियोनल मेसी केरला आउँने भएका हुन ।भारतमा अर्जेन्टिनाका टोलीले दुई खेल खेल्ने तालिका बनेको छ ।’ विश्वविजेता अर्जेन्टिनाविरुद्धको प्रतिद्वन्द्वी को हुने र खेल कुन मैदानमा हुने भन्ने टुंगो भने नलागेको हो ।
मेसी दोस्रो पटक भारत आउन लागेका हुन् । सन् २०११ मा पनि उनी भारत आएका थिए । सो बेला कोलकातामा अर्जेन्टिनाले अर्को दक्षिण अमेरिकी राष्ट्र भेनेजुएलासँग मैत्रीपूर्ण खेल खेलेको थियो । जहाँ मेसीकै पासमा निकोलस ओटामेन्डीले गोल गरेपछि खेल अर्जेन्टिनाले १ ० ले जितेको थियो ।
कोलकाता स्थित विमानस्थलमा मेसी झर्दा त्यहाँ छुट्टै माहोल बनेको थियो । उनलाई हिन्दू परम्परा अनुसार रातो टीका लगाइदिएर स्वागत गरिएको थियो । मेसीको नाम र नम्बर अंकित जर्सी लगाएका समर्थकले उनको पक्षमा नारा समेत लगाएका थिए ।
मेसीलाई हेर्न र भेट्न हजारौँ समर्थक विमानस्थलको गेटमा जम्मा भएका थिए । जसले गर्दा गेट नै जाम भएको थियो । यस्तो अवस्थामा भारतीय सुरक्षाकर्मीले वैकल्पिक गेटबाट मेसीलाई गन्तव्यमा पुर्याउनु परेको हो ।
मेसी भारतमा भएको भेनेजुएलासँगको सोही खेलबाट पहिलोपटक राष्ट्रिय टोलीको कप्तान नियुक्त भएका थिए । भारतपछि अर्जेन्टिनाले बंगलादेशको भ्रमण गरेका हुन । त्यहाँ र्जेन्टिनाले नाइजेरिया सँग मैत्रीपूर्ण खेलेको सो खेलमा पनि अर्जेन्टिनाले ३ १ ले जित्न सफल भएको हो ।
