नेपाली क्रिकेट टिमले शनिबार बिहानै एक खेल खेलिसकेको छ भने अझै दुई खेल हुन बाँकी छ । अमेरिका भ्रमणमा रहेको नेपालले शनिबार बेलुका सवा ९ बजे घरेलु टिम अमेरिकासँग आईसीसी विश्वकप लिग २ को अमेरिका सिरिजअन्तर्गत तेस्रो खेल खेल्दै छ ।
जारी सिरिजमा नेपालले अमेरिका सँगको पहिलो खेलमा हार व्यहोरेको थियो भने दोस्रो खेलमा स्कटल्यान्ड्सलाई पराजित गरेको हो । लिग २ को अंक तालिकामा पुछारबाट दोस्रो स्थानमा रहेको नेपालले करिब ८ महिनापछि विदेशी भूमिमा ओडीआई जितेको थियो, स्कटल्यान्ड्सलाई हराउँदा । लिगमा खराब लयमा रहेको नेपालका लागि शनिबार अमेरिकासँगको खेल निकै महत्त्वपूर्ण हुनेछ ।
यस्तै हङकङ भ्रमणमा रहेका नेपाली टिमले शनिबार दिउँसो श्रीलंका विरुद्ध हङकङ सिक्सेस प्रतियोगिताको क्वार्टरफाइनल खेल्दै छ । खेल दिउँसो सवा एक बजे सुरु हुनेछ । प्रतियोगिताको समूह बी मा रहेको नेपालले समूह चरणका दुवै खेल जितेको हो । शुक्रबार इंग्ल्यान्डलाई हराएको नेपालले शनिबार बिहान अस्ट्रेलियालाई पराजित गरेको थियो ।
