कुशवाहा हत्या प्रकरणका मुख्य आरोपी साढे ५ महिनापछि पक्राउबाराको कलैयास्थित रामराजा मोहनविक्रम शाह बहुमुखी क्याम्पसका प्रमुख हरिभूषण कुशवाहाको हत्यामा संलग्न मुख्य अभियुक्तलाई प्रहरीले पक्राउ गरेको छ । जिल्ला प्रहरी कार्यालय बाराका प्रमुख एसपी महेन्द्र खड्काका अनुसार पक्राउ पर्नेमा आदर्श कोतवाल गाउँपालिका २ खजुरिया बस्ने सुरेन्द्र प्रसाद कुशवाहा रहेका छन् भने उनलाई विराटनगरबाट पक्राउ गरिएको हो ।
सुरेन्द्र क्याम्पस प्रमुख हरिभुषणको हत्याको मुख्य योजनाकाररनिर्देशक, हतियार व्यवस्थापक र सुटर रहेको एसपी खड्काले जानकारी दिएका हुन । सुरेन्द्रकै योजनामा थप १४ जना परिचालित भई हरिभूषणको हत्या गरेको प्रहरीको अनुसन्धानबाट खुलेको हो । गत जेठ ३२ गते हरिभूषणको बाराको आदर्श कोतवाल गाउँपालिका नजिकै गोली हानी हत्या गरिएको थियो ।
प्रहरीले सरकारी वकिल कार्यालयमा बुझाएको मिसिलमा खजुरियाका चाँदशी प्रसाद कुशवाहा, चन्द्रमणि कुशवाहा, अबधलाल कुशवाहा, सुमेदप्रसाद कुशवाहा, आदर्शकोतवाल ३ का चुल्हाई भन्ने श्रवणकुमार शाह, कोहल्वी नगरपालिका १० बरेवा बस्ने अम्रपाली भन्ने ब्रम्हदेव महरा, करैया माई गाउँपालिका ७ पिपरा बस्ने मोतिलाल चौधरी र बारागढी गाउँपालिका ५ बस्ने हरिन्दर महरा चमार हत्यामा संलग्न रहेको देखिएको हो ।
त्यसैगरी आदर्शकोतवाल २ खजुरी कालेजप्रसाद कुशवाहा, जुवेद पासवान, राजक पुर कुशवाहा, सन्नी देवल कुशवाह, र कोहल्वी नपा १० बरेवा बस्ने हरिन्दर चौधरीलाई प्रहरीले फरारको सूचीमा राखेका छन । हत्यामा संलग्न १४ जनामध्ये कसैको भूमिका हरिभूषण सवार मोटरसाइकलको रेकी गर्ने, हतियार व्यवस्थापन गर्ने, हत्यामा प्रयोग भएको मोटरसाइकल व्यवस्थापनदेखि चालकको भूमिका निर्वाह गर्ने र घटना भइसकेपछि हतियार लुकाउने लगायत रहेका छन् ।
अनुसन्धान मिसिल अनुसार सन्नी देवलको भूमिका योजनामा सामेल हुने र हरिभूषण सवार मोटरसाइकलको निगरानी गर्ने, चन्द्रमणिको भूमिका योजनाकारसँगै हातहतियार व्यवसथापन र हरि भूषणको रेकीगरी सूचना अदानप्रदान गर्ने, कालेजले हतियार व्यवस्थापन गर्ने र मोटरसाइकल चालकको भूमिका निर्वाह गरेको उल्लेख गरिएको छ । त्यस्तै, अवधलालले हत्या योजनामा सामेल हुनुका साथै हरिभूषणको रेकी गर्ने गरेको प्रहरीले जनाएको छ भने प्रहरीले उनको घरबाट दुई राउण्ड गोलीसमेत बरामद गरेको थियो । चुल्हाई भन्ने श्रवणकुमारले पनि हतियार व्यवस्थापनमा सहयोग गरेको प्रहरीको अनुसन्धान मिसिलमा उल्लेख गरिएको हो ।
त्यस्तै, हरिन्दरले घटनामा प्रयोग भएको हतियार र गोली सुरेन्द्रलाई बिक्री गरेको, ब्रम्हदेवले घटना भइसकेपछि हतियार लुकाएर राखेको र योजनामा प्रयोग भएको मोटरसाइकल पछाडि बसेको, हरिन्दरले हतियार बिक्री गरेको, सुमेद र ओमप्रकाशले हरिभूषण सवार टरसाइकलको रेकी गरेको अनुसन्धान मिसिलमा उल्लेख रहेको छ ।
