भारतको महाराष्ट्र राज्यको पुणे जिल्लास्थित मावल तालुकमा रहेको एउटा निर्माण फर्ममा भएको विष्फोटमा परी घाइते भएका एक नेपालीको मृत्यु भएको छ । २२ वर्षीय अजयकुमार बजरंगी प्रसाद मौर्यको उपचारको क्रममा मृत्यु भएको इन्डियन प्रेसले जनाएको हो ।
मृतक मौर्य परान्दवाडीमा सवारी साधनको स्पेयर पार्ट्स बनाउने कम्पनीमा काम गर्ने र सोही कम्पनीको परिसरमा बस्दै आएका थिए ।बिहीबार मौर्यले खाना पकाउन चुल्हो बाल्न रासायनिक पदार्थ प्रयोग गरेको स्थानीय प्रहरीले जनाएको छ । तर, उक्त पदार्थ विस्फोट हुँदा उनी गम्भीर घाइते भएका र उनलाई उपचारको लागि नजिकैको अस्पताल लगिएको थियो ।
अस्पतालमा सर्जरी भइरहेको बेला उनको मृत्यु भएको हो । यस सम्बन्धमा सिरगाउँ प्रहरी चौकीमा आकस्मिक मृत्युको मुद्दा दर्ता गरी थप अनुसन्धान सुरु गरिएको प्रहरीले जनाएका छन ।
