मधेश प्रदेश सरकार र कमला नदीमा नयाँ पुल निर्माणको लागि आमरण अनशनरत सङ्घर्ष समितिबीच शुक्रबार चारबुँदे सहमति भएको छ । सहमतिपछि भदौ ४ गतेदेखि जारी आमरण अनशन समेत स्थगित भएको हो ।
मधेश प्रदेश सरकारका मुख्यमन्त्री सतीशकुमार सिंह र सङ्घर्ष समितिका संयोजक प्रविन कुमार मोरबैता यादवले सहमतिपत्रमा हस्ताक्षर गरेका छन ।
हस्ताक्षर भएको चारबुँदे सहमतिमा कमला नदीमा नयाँ पुल निर्माण गर्ने, पुल निर्माणका लागि आवश्यक बजेट आगामी आर्थिक वर्ष २०८२–८३ मा राख्न सङ्घ सरकारमा पहल गर्ने सहमति भएको उल्लेख गरिएको छ ।
सङ्घबाट बजेट प्राप्त नभएमा सम्पूर्ण बजेट मधेश प्रदेश सरकारको स्रोतबाट व्यहोर्ने सहमति भएको र आगामी मङ्सिर १ गतेभित्र पुलको डिपिआर तयार गरी बोलपत्र आह्वान गरिने र नयाँ कमला पुल निर्माण सङ्घर्ष समिति सिराहा–धनुषाको सङ्घर्षका सम्पूर्ण कार्यक्रम आजैका मितिबाट स्थगित गरिने उल्लेख गरिएको हो।
