बाराको निजगढमा यात्रुवाहक बस दुर्घटना हुँदा एक जनाको मृत्यु भएको छ भने ८ जना गम्भिर घाईते भएका छन् । बिराटनगर बाट दाङ जादै गरेको बस आईतबार मध्यरातमा निजगढ नगरपालिका वडा नम्बर ८ मा पर्ने उन्नासी पुलमा दुर्घटनामा परेको हो ।
चालक र सहचालक सहित ४३ जना सवार ना ८ ख ११६४ नम्बरको यात्रुवाहक बस दुर्घटना हुँदा चालकको मृत्यु भएको प्रहरीले जनाएका छन । बस चालक दाङ देउखुरी गटवा गाउँपालिका–५ का ४५ वर्षीय चेतन राय यादवको मृत्यु भएको हो ।
दुर्घटनामा गम्भीर घाइते बनेका यादवको वीरगञ्ज स्थित नेपाल मेडिसिटी बयोधा अस्पतालमा उपचारको क्रममा आज विहान मृत्यु भएको ईलाका प्रहरी कार्यालय निजगढका प्रहरी निरीक्षक सुमित कुशवाहाले जानकारी दिएका हुन ।
अन्य गम्भिर घाईते ७ जनालाई सोही अस्पतालमा उपचार भईरहेको र दुर्घटनामा परेर मध्यम र समान्य घाईतेहरुको उपचार निजगढ स्थित सामुदायीक प्रसुती गृह अस्पताल र सिटी अस्पतालमा भईरहेको प्रहरीले जनाएको हो । प्रहरी निरिक्षक कुशवाहाका अनुसार १५ जना मध्यम र २० जना समान्य घाईते रहेका छन् ।
प्रहरीका अनुसार बसको अगाडीको पट्टा भाँचिएर बस अनियन्त्रित भएर पुलको १० मिटर तल खसेको र दुर्घटनाको अवस्था हेर्दा ठुलो क्षतिबाट जोगिएको प्रहरी निरिक्षक कुशवाहाले बताएका हुन ।
