बकैया खोलाले बगाएर चार दिनदेखि बेपत्ता भएका एकजनाको शव फेला परेको छ । मंगलबार अर्थात आज बिहान रौतहट चन्द्रपुर नगरपालिका–२ जुडि बेलाका ४२ वर्षीय अकले कुस्वार माझीको शव बाराको कोल्बी नगरपालिका–२ बकैया खोलाको बगरमा फेला परेको प्रहरीले जनाएका छन ।
इलाका प्रहरी कार्यालय निजगढ बाराबाट खटिएको टोलीले माझीको शव प्रादेशिक अस्पताल कलैया बारा पठाइएको मकवानपुर जिल्ला प्रहरी कार्यालयका प्रवक्ता प्रहरी नायब उपरीक्षक लक्ष्मी भण्डारीले जानकारी दिएका हुन । मकवानपुरको बकैया गाउँपालिका–६ स्थित जसपालमा निर्माण भइरहेको द्रुत मार्गमा काम गर्दै आएका माझी बकैया–६ जुनाइ स्थित खोला तर्ने क्रममा यही भदौ २१ गते आएको खोलाको बाढीले बगाउँदा बेपत्ता भएका थिए ।
इलाका प्रहरी कार्यालय निजगढ बाराको समन्वयमा बेपत्ता माझीको खोजतलास गर्ने क्रममा बिहान खोला किनारमा शव फेला परेको प्रहरी नायब उपरीक्षक भण्डारीले बताएका छन ।
