हुलाकी राजमार्गअन्तर्गत धनुषा र सिरहा जोड्ने कमला पुल पुनः निर्माणमा दबाब दिन सिरहाका इन्जिनियरहरूले आन्दोलन गरेका छन् ।
सिरहाका इन्जिनियरहरूको अगुवाइमा गठित संघर्ष समितिले आन्दोलनको घोषणा गरेका हुन । संघर्ष समितिका संयोजक प्रवीणकुमार यादवले मंगलबार सरोकारवाला पक्ष तथा बुद्धिजीविहरूबीच छलफल भएपछि दबाब सिर्जनात्मक स्वरुप आन्दोलनको कार्यक्रम तय गरेको बताएको हो । जसअन्तर्गत आज सिरहाको महावीर चोकदेखि थाना चोकसम्म दबाब जुलुस गर्ने कार्यक्रम रहेको उनले बताएका छन ।
आगामी आइतबार सिरहाको बसबिट्टा चोकदेखि मुख्यमन्त्री कार्यालय जनकपुरसम्म मोटरसाइकल जुलुसयात्रा गर्ने संघर्ष समितिले जनाएको छ । कमला पुल पुनः निर्माण अघि नबढाएसम्म आन्दोलनका थप कार्यक्रमहरु सार्वजनिक गरिने समितिका संयोजक यादवले बताएका हुन । मधेशको दीर्घकालीन महत्व बोकेको कमला पुल निर्माण नहुँदा सिरहा र सप्तरीका सर्वसाधारण प्रदेशको राजधानी जनकपुरधाम आउन जान सास्ती भोग्दै आएका छन् ।
प्रदेश तथा सङ्घीय सरकारका विभिन्न मन्त्रीलाई यस विषयमा ध्यानाकर्षण गराउँदा समयमा पुल बन्न नसकेको स्थानीयले गुनासो पोखेको हो । करिब १३ वर्षअघि निर्माण सम्पन्न भई उद्घाटनको तयारी गरिएको बेला कमला नदीमा आएको बाढीले पुल भासिएको सो पुल अझैसम्म पनि पुनः निर्माण हुन नसकेको हो ।
