सप्तरीको कञ्चनरुप नगरपालिकाको स्वास्थ्य शाखा कञ्चनपुरले ६७ वटा खोप केन्द्र मार्फत दादुरा–रुवेला खोप अभियान सञ्चालन गरेको छ । कञ्चनरुप नगरपालिकामा ९ महिनादेखी १५ बर्ष मुनिका १७ हजार ९ सय बालबालिकाका लागि आईतबारदेखी ६७ वटा खोप केन्द्रबाट दादुरा–रुवेला खोप अभियान सञ्चालन गरेका हुन् । कञ्चनरुपका स्वास्थ्य शाखा सह संयोजक डम्बर प्रसाद गुप्ताका पहिलो दिन करिब ३ हजार बालबालिकाहरुले खोप लगाएका छन् । अभियानअन्तर्गत १२ वटै वडाका सामुदायिक र निजी विद्यालय,स्वास्थ्य चौकीमा खोप केन्द्र राखिएको छ । खोप अभियानलाई सहज, सुलभ र प्रभावकारी ढङ्गमा सञ्चालन गर्न पालिकाभर खोप कार्यकर्ता तथा स्वयंसेवक गरी २५७ जना जनशक्ति परिचालन गरिएको छ । आउँदो असार १४ गते मधेश प्रदेशलाई पनि पूर्ण खोप प्रदेश घोषणा गर्ने लक्ष्य रहेको छ । मधेश प्रदेश दादुरा र रुवेलाको सर्वाधिक जोखिममा रहेको प्रदेश भएको विगतका घट्नाक्रमहरुले देखाएका छन् । मुख्यतया यहाँका ग्रामीण भेग दादुराको प्रकोपले आक्रान्त हुँदै आएको छ । अहिले खोप लगाउन छुटेका बालिकाबाट पछि जन्मने बच्चामासमेत रुवेला सङ्क्रमणको जोखिम रहने भएकोले खोप अभियानलाई सफल बनाउनु सबैको दायित्व भएको सह संयोजक गुप्ताले बताएका छन । स्थानीय तहहरूले पनि कुनै बालबालिका दादुरा–रुवेलाको जोखिममा नपरून् भनी खोप अभियान सञ्चालनमा जुटेको दाबी गरेका छन् । खोप अभियानबाट लक्षित उमेरका कुने बालबालिका छुट्ना नपाओस् भनी नगरपालिकाले वडादेखि टोल बस्तीसम्म प्रचार प्रसारका र सचेतीकरण अभियानलाई तीव्रता दिने गुप्ताले बताएका छन ।
